উচ্ছেদৰ পিছতেই উৰিয়ামঘাটত চেগুন গছ চোৰৰ উপদ্ৰৱ

উল্লেখযোগ্য যে, উৰিয়ামঘাটৰ ৰেংমা বনাঞ্চলত বেদখলকাৰীক উচ্ছেদৰ পিছতেই ইটোৰ পিছত সিটো অনৈতিক, দুষ্কাৰ্য সংঘটিত হৈ আহিছে । উৰিয়ামঘাটত উচ্ছেদৰ পিছতেই তামোল, শিল, কাঠৰ ৰমৰমীয়া বেহাৰ লগতে চোৰৰ উপদ্ৰৱ বৃদ্ধি পাইছে । উৰিয়ামঘাটৰ ৰেংমা বনাঞ্চলত এইবাৰ দুষ্কৃতিকাৰীৰ চকু পৰিল মূল্যবান গছত ৷ সোমবাৰে নিশা দুষ্কৃতিকাৰীয়ে লাখ লাখ টকাৰ মূল্যৱান গছ কাটি টহিলং কৰে ৷ অৱশ্যে বন বিষয়া অহাৰ খবৰ পাই ঘটনাস্থলীৰ পৰা পলায়ন কৰে​ কাঠ চোৰৰ দলটোৱে ৷ এই অভিযানত বন বিভাগে দুখনকৈ বাইকৰ লগতে গছ কটা সামগ্রী জব্দ কৰে ।

জানিব পৰা মতে খবৰৰ ভিত্তিত উৰিয়ামঘাটৰ খণ্ড বন বিভাগৰ এটি দলে অভিযান চলাইছিল । অভিযানত AS 05 1451 নম্বৰৰ এখন মটৰচাইকেলৰ লগতে নম্বৰ প্লেটবিহীন আন এখন মটৰচাইকেল আৰু গছ কাটিবলৈ ব্যৱহাৰ কৰা সামগ্ৰী জব্দ কৰে ৷