ৰোগীৰ বহিঃৰাজ্যলৈ বহিঃগমন ৰোধ কৰিবলৈ চিকিৎসকৰ আত্মবিশ্বাস আৰু দক্ষ নেতৃত্ব থাকিব লাগিব”

“ৰোগীৰ বহিঃৰাজ্যলৈ বহিঃগমন ৰোধ কৰিবলৈ চিকিৎসকৰ আত্মবিশ্বাস আৰু দক্ষ নেতৃত্ব থাকিব লাগিব” — ডাঃ তন্ময় দাসৰি-ভই, মেঘালয় | ১৫ মে’, ২০২৬ঃ ইউনিভাৰ্ছিটি অৱ চাইন্স এণ্ড টেকন’লজি মেঘালয় (USTM)-ৰ অন্তৰ্গত পা চাংমা ইণ্টাৰনেশ্যনেল মেডিকেল কলেজ এণ্ড হাস্পতাল (PIMC)-এ “Celesta-26” দ্বিতীয় কলেজ সপ্তাহ উপলক্ষে আয়োজিত অনুষ্ঠানত বিশিষ্ট বৃক্কৰোগ বিশেষজ্ঞ তথা গুৱাহাটীস্থিত Apollo International Hospital-ৰ মুখ্য নেফ্ৰ’লজিষ্ট ডাঃ তন্ময় দাসক আতিথ্য প্ৰদান কৰে। উত্তৰ-পূৰ্বাঞ্চলৰ প্ৰথম প্ৰজন্মৰ অগ্ৰগণ্য চিকিৎসকসকলৰ অন্যতম ডাঃ তন্ময় দাস অসমৰ এক প্ৰগতিশীল আৰু সন্মানীয় পৰিয়ালৰ সন্তান। তেওঁৰ পিতৃ অসমৰ প্ৰাক্তন মুখ্য সচিব হিচাপে দায়িত্ব পালন কৰিছিল। ডাঃ দাসে দীৰ্ঘদিন ধৰি নেফ্ৰ’লজি আৰু স্বাস্থ্যসেৱাৰ ক্ষেত্ৰত উল্লেখযোগ্য অৱদান আগবঢ়াই আহিছে।PIMC-ৰ MBBS শিক্ষাৰ্থীসকলক উদ্দেশ্যি ভাষণ প্ৰদান কৰি ডাঃ দাসে চিকিৎসা জীৱনৰ দীঘলীয়া অভিজ্ঞতা আৰু অনুপ্ৰেৰণাদায়ক যাত্ৰাৰ কথা বৰ্ণনা কৰে। তেওঁ চিকিৎসা পেছাত নিষ্ঠা, শৃংখলা, নৈতিকতা আৰু মানৱীয় মূল্যবোধৰ গুৰুত্বৰ ওপৰত আলোকপাত কৰে। লগতে শিক্ষাৰ্থীসকলক উৎকৰ্ষ সাধনৰ লগতে চিকিৎসকৰ মানৱীয় দায়িত্বৰ সৈতে সদায় সংযুক্ত হৈ থাকিবলৈ আহ্বান জনায়।ডাঃ তন্ময় দাসে কয়—“এজন চিকিৎসকে নিজৰ জ্ঞান, সহমৰ্মিতা, যোগাযোগ দক্ষতা আৰু দায়বদ্ধতাৰ জৰিয়তে ৰোগীৰ আস্থা অৰ্জন কৰিব লাগিব। যদি আমি উত্তৰ-পূৰ্বাঞ্চলতে মানসম্পন্ন স্বাস্থ্যসেৱা আৰু বিশ্বাসযোগ্য চিকিৎসা ব্যৱস্থা গঢ়ি তুলিব পাৰো, তেন্তে চিকিৎসাৰ বাবে ৰোগীৰ বহিঃৰাজ্যলৈ যোৱাৰ প্ৰৱণতা যথেষ্ট হ্ৰাস পাব।”অনুষ্ঠানৰ অন্তৰ্গত এক আন্তঃক্ৰিয়ামূলক অধিবেশনত ডাঃ দাসে PIMC-ৰ প্ৰথম আৰু দ্বিতীয় বেচৰ শিক্ষাৰ্থীসকলৰ সৈতে মত-বিনিময় কৰে। তেওঁ শিক্ষাৰ্থীসকলৰ বিভিন্ন প্ৰশ্নৰ উত্তৰ দিয়াৰ লগতে আত্মবিশ্বাস আৰু দায়বদ্ধতাৰে আগবঢ়াৰ বাবে উৎসাহিত কৰে। তেওঁৰ বক্তব্য আৰু পৰামৰ্শই শিক্ষাৰ্থীসকলৰ মাজত বিশেষ অনুপ্ৰেৰণাৰ সৃষ্টি কৰে।অনুষ্ঠানত USTM-ৰ উপাচাৰ্য প্ৰফেচৰ জি. ডি. শৰ্মা, প্ৰ’-উপাচাৰ্য পদ্মশ্ৰী ডাঃ এছ. সাহাৰিয়া, PIMC-ৰ অধ্যক্ষ প্ৰফেচৰ হেম কান্ত শৰ্মা, আইএএমচি-ৰ অধ্যক্ষ ডাঃ আৰ. কে. শৰ্মা, চিকিৎসা প্ৰশাসনৰ সঞ্চালক প্ৰফেচৰ (ডাঃ) অমল চন্দ্ৰ কাটাকী আদি বিশিষ্ট ব্যক্তি উপস্থিত থাকে।USTM ভ্ৰমণকালত ডাঃ তন্ময় দাসে বিশ্ববিদ্যালয়খনৰ অত্যাধুনিক গৱেষণা কেন্দ্ৰ আৰু বিভিন্ন একাডেমিক সুবিধাসমূহ পৰিদৰ্শন কৰে। তেওঁ শিক্ষক, গৱেষক আৰু শিক্ষাৰ্থীসকলৰ সৈতে মত-বিনিময় কৰি বিশ্ববিদ্যালয়খনৰ গৱেষণা, উদ্ভাৱন আৰু আন্তঃবিষয়ক শিক্ষাৰ ওপৰত গুৰুত্ব আৰোপক প্ৰশংসা কৰে। লগতে USTM আৰু ইয়াৰ প্ৰতিষ্ঠাপক চ্যান্সেলৰৰ উদ্যোগী যাত্ৰাক উচ্চ প্ৰশংসা কৰি কয় যে দূৰদৰ্শী নেতৃত্ব, নিষ্ঠা আৰু গুণগত শিক্ষা-স্বাস্থ্যসেৱাৰ প্ৰতি দায়বদ্ধতাৰ ফলতেই USTM উত্তৰ-পূৰ্বাঞ্চলৰ এক অগ্ৰণী শিক্ষাকেন্দ্ৰ হিচাপে গঢ় লৈ উঠিছে। বিশ্ববিদ্যালয়খনৰ দ্ৰুতগতিত বিস্তৃত একাডেমিক আৰু চিকিৎসা পৰিকাঠামোকো তেওঁ শিক্ষাগত ৰূপান্তৰৰ এক আদৰ্শ হিচাপে অভিহিত কৰে।PIMC-ৰ দ্বিতীয় কলেজ সপ্তাহ “Celesta-26”-ৰ অন্তৰ্গত এই অনুষ্ঠানটোৱে চিকিৎসা শিক্ষা আৰু পেছাগত মূল্যবোধ বিকাশৰ ক্ষেত্ৰত USTM-ৰ দায়বদ্ধতাক পুনৰ এবাৰ প্ৰতিফলিত কৰিলে।