কুংকি চৌধুৰীৰ পৰিয়ালৰ বিৰুদ্ধে আইনী ব্যৱস্থা লোৱাৰ হুংকাৰ মুখ্যমন্ত্ৰীৰ

শনিবাৰে যোৰহাটত বিজেপি প্ৰাৰ্থী হিতেন্দ্ৰ নাথ গোস্বামীৰ হৈ নিৰ্বাচনী প্ৰচাৰ চলাই মুখ্যমন্ত্ৰীগৰাকীয়ে । ডচ কোম্পানী চাৰিআলিৰ পৰা গড়আলি হৈ বৰুৱা চাৰিআলিলৈ এক বৃহৎ ৰ’ড শ্ব সম্বোধন কৰে মুখ্যমন্ত্ৰীয়ে ।এই সময়ত মুখ্যমন্ত্ৰীয়ে মধ্য গুৱাহাটীৰ বিৰোধীৰ প্ৰাৰ্থী কুংকি চৌধুৰী আৰু তেওঁৰ পৰিয়ালক উদ্দেশ্যি পুনৰ বিস্ফোৰক মন্তব্য কৰে । তেওঁ কয়, “কুংকি চৌধুৰীৰ মাক-বাপেকে গৰুৰ মাংস খায় । অসমত সত্ৰাধিকাৰ আছে, কামাখ্যা মন্দিৰ আছে, বটদ্ৰৱা থানা আছে, এই অসমত গৰুৰ মাংস খাব দিম আমি ? মই মিঞাকে গৰুৰ মাংস খোৱা বন্ধ কৰাইছোঁ আৰু এইবাৰ কুংকি চৌধুৰীক গৰুৰ মাংস খাব দিম নেকি ? তেওঁ যদি কয় দেউতা-মা মোৰ নহয় মই তেওঁৰ লগত আছোঁ । কালিৰ পৰা কি কৈ আছে যে মোৰ ককাদেউতাই সংবিধানত চহী কৰিছিল । সেইখন সংবিধানতে লিখা আছে গৰুৰ মাংস খাব নালাগে বুলি ।”কুংকি চৌধুৰীৰ পৰিয়ালৰ বিৰুদ্ধে আইনী ব্যৱস্থা লোৱাৰো হুংকাৰ দিয়ে মুখ্যমন্ত্ৰীয়ে । তেওঁ কয়, “নিৰ্বাচনৰ পিছত গো-সুৰক্ষা আইনৰ অধীনত দেউতাক-মাকৰ ওপৰত মই এক্সন লৈ আছোঁ । বাকী চব মানিম, গৰুৰ মাংস খোৱা মই নামানোঁ । লুৰীণজ্যোতি গগৈয়ে ক্ষমা খুজিব লাগে আজি । হিন্দু মানুহক অপমান কৰি আছে । মই পৃথিৱীক টাৰ্গেট কৰিম যদি গৰুৰ মাংস খায় । ধুবুৰীত ঈদত গৰুৰ মাংস অনা কাৰণে মই শ্বুট এত ছাইট অৰ্ডাৰ দিছিলোঁ । আজিকালি মুছলমান মানুহেও মোৰ কথাত গৰুৰ মাংসৰ পৰিৱৰ্তে ম’হৰ মাংস খায় ।”তেওঁ লগতে গো-মাংস ভক্ষণৰ বিৰোধিতাৰে কয়, “অসমত এনেকৈ দাঁতেৰে গৰুৰ মাংস কামুৰি ইনষ্টাগ্ৰাম দিয়া নচলিব । ইয়াত আইন আছে । কোন এইটো ওলাল চৌধুৰী হিন্দু মানুহক অপমান কৰিব ।”মুখ্যমন্ত্ৰীৰ অভিযোগ যে কুংকি চৌধুৰীৰ পিতৃয়ে মাটি দখল কৰে । তেওঁ কয়, “মোৰ সমষ্টিতে ইউনিভাৰ্চিটি আছে । তেওঁৰ বাপেকে কেইদিনমান আগতে মাটি দখল কৰি মাৰপিট কৰিছে ।”