অসমলৈ প্ৰদৰ্শনৰ বাবে বৃন্দাৱনী বস্ত্ৰ আনিবলৈ কাইলৈ অসম চৰকাৰ আৰু ব্রিটিছ সংগ্রহালয়ৰ মাজত বুজাবুজি চুক্তি স্বাক্ষৰিত হ’ব। ইয়াৰ বাবে লণ্ডনত উপস্থিত হোৱা মুখ্যমন্ত্রী ড° হিমন্ত বিশ্ব শর্মাই এই তথ্য সদৰী কৰে। মুখ্যমন্ত্রীয়ে কয়, ‘আমি এই বুজাবুজি চুক্তিত স্বাক্ষৰ কৰিম, যাৰ জৰিয়তে ল’নিং এৰেঞ্জমেণ্টৰ বিশেষ মাধ্যমৰে এই ঐশ্বর্যপূর্ণ সম্পদবিধ অসম ভূমিলৈ ওভতাই আনিব পৰা যাব।
মহাৰাজ নৰনাৰায়ণৰ পৃষ্ঠপোষকতাত আৰু মহাপুৰুষ শ্ৰীমন্ত শংকৰদেৱৰ উদ্যোগত গুৰুজনাৰ অন্যতম প্রিয় শিষ্য মথুৰাদাস বুঢ়া আতাৰ তত্ত্বাৱধানত ১৬শ শতিকাত বৃহদাকাৰৰ এই বস্ত্ৰখন বৰপেটাৰ তাঁতশিল্পীয়ে বৈ উলিয়াইছিল। সমগ্র কৃষ্ণলীলা অংকিত কৰা বস্ত্ৰখন পৰৱৰ্তী সময়ত খণ্ড-বিখণ্ড হয় আৰু সেইবোৰৰ অংশসমূহ বিশ্বৰ আগশাৰীৰ কে’বাটাও সংগ্রহালয়ত সংগৃহীত হৈ আছে। অসমীয়াৰ অতি আদৰ আৰু ভক্তিভৰা এই বস্ত্ৰখন ব্রিটিছ মিউজিয়ামত সংৰক্ষিত থকা অংশটো অসমলৈ প্ৰদৰ্শনৰ বাবে অনাৰ উদ্যোগ ৰাজ্য চৰকাৰে গ্ৰহণ কৰে। ব্ৰিটিছ মিউজিয়ামৰ চৰ্তত সম্মতি জনাই অসম চৰকাৰে বস্ত্ৰৰ অংশটো ৰাজ্যখনলৈ অনাৰ চেষ্টা চলায় আৰু তাৰ বাবে কাইলৈ বুজাবুজি চুক্তিত স্বাক্ষৰ কৰা হ’ব।
By
By
