১ লাখ ৬৫ হাজাৰক দিয়া হ’ল চাকৰি বৰ্তমান চৰকাৰৰ অন্তিমটো নিযুক্তি প্ৰদান অনুষ্ঠান

নিৰ্বাচনৰ প্ৰাকক্ষণত হিমন্ত বিশ্ব শৰ্মা নেতৃত্বাধীন ৰাজ্য চৰকাৰে অন্তিমটো নিযুক্তি অনুষ্ঠানৰ আয়োজন কৰে । বৃহস্পতিবাৰে গুৱাহাটীৰ খানাপাৰাত এক অনুষ্ঠানত মুখ্যমন্ত্ৰীয়ে ৫,৬৯০ গৰাকী প্ৰাৰ্থীক নিযুক্তি পত্ৰ প্ৰদান কৰে ।মুখ্যমন্ত্ৰীয়ে সংবাদ মাধ্যমৰ আগত কয়, “এইটো পুনৰ এক স্বচ্ছ নিয়োগ প্ৰক্ৰিয়া । বিগত ৫ বছৰত মই অসমৰ ৰাইজক দিয়া প্ৰতিশ্ৰুতি পূৰণ কৰিবলৈ সক্ষম হৈছোঁ আৰু যোগ্য প্ৰাৰ্থীক নিয়োগ পত্ৰ প্ৰদান কৰিছোঁ । অসমৰ পূৰ্বৰ কোনো এখন চৰকাৰে ইমান বৃহৎ সংখ্যক নিয়োগ আগবঢ়াব পৰা নাছিল । পূৰ্বে চৰকাৰসমূহে ২০ হাজাৰৰ পৰা ৫০ হাজাৰমান চাকৰি প্ৰদান কৰিব পাৰিছিল । আমি ১ লাখ চাকৰি দিয়াৰ প্ৰতিশ্ৰুতি দিছিলোঁ, কিন্তু এতিয়া সেই সংখ্যা অতিক্ৰম কৰি ১ লাখ ৬৪ হাজাৰৰো অধিক চাকৰি প্ৰদান কৰা হৈছে ।”মুখ্যমন্ত্ৰীয়ে লগতে জনাই যে বৰ্তমান চৰকাৰৰ ৫ বছৰৰ কাৰ্যকালত এইটো নিয়োগ পত্ৰ বিতৰণৰ অন্তিম কাৰ্যসূচী । মুখ্যমন্ত্ৰীয়ে অভিযোগ কৰে যে পূৰ্বৰ চৰকাৰসমূহৰ সময়ত নিয়োগ প্ৰক্ৰিয়াত ব্যাপক দুৰ্নীতি সংঘটিত হৈছিল । তেওঁ কয়, “আগতে এ পি এছ চিৰ পৰা আৰম্ভ কৰি অংগনৱাড়ী নিয়োগলৈকে বহু ক্ষেত্ৰত অনিয়ম হৈছিল । আনকি আশাকৰ্মী বা মধ্যাহ্ন ভোজন আঁচনিৰ কৰ্মীসকলেও চাকৰি লাভ কৰিবলৈ ধন দিবলগীয়া হৈছিল । নিম্নস্তৰৰ চাকৰিৰ বাবে প্ৰায় ১ লাখ টকা আৰু এ চি এছ বা ডি এছ পি স্তৰৰ চাকৰিৰ বাবে ১ কোটি টকালৈকে ধন দিবলগীয়া হৈছিল । কংগ্ৰেছৰ দিনত প্ৰতিটো চাকৰিৰে এটা দৰ আছিল । কংগ্ৰেছৰ মন্ত্ৰী, বিধায়ক সকলোৱে তাত জঁপিয়াই পৰিছিল ।”