মাদক দ্ৰব্য সেৱনৰ বিৰুদ্ধে সজাগতা বৃদ্ধিৰ বাবে বৰডুমচাত মাৰাথান দৌৰ প্ৰতিযোগিতা সম্পন্ন।

চৰাইদেউৰ দুৰ্গেচ কুৰ্মীয়ে লাভ কৰিলে প্ৰথম স্থান । উজনি অসমৰ বিভিন্ন প্ৰান্তৰ খেলুৱৈৰ যোগদান।
অসমীয়া যুৱ মঞ্চ, তিনিচুকীয়া জিলা সমিতিৰ সৌজন্যত বৰডুমচা- পেঙেৰীৰ আঞ্চলিক সমিতিৰ উদ্যোগত আৰু বৰডুমচাবাসীৰ সহযোগত মাদকদ্ৰব্য সেৱনৰ বিৰুদ্ধে যুৱ প্ৰজন্মক সজাগ কৰাৰ উদ্দেশ্যেৰে আজি এক দৌৰ প্ৰতিযোগিতা অনুষ্ঠিত কৰা হয় । চুবুৰীয়া অৰুণাচল প্ৰদেশৰ নামচাইৰ পৰা আৰম্ভ কৰি অসমৰ মাধৱপুৰ প্রাথমিক বিদ্যালয়ৰ খেলপথাৰলৈ অনুষ্ঠিত কৰা হয় মাৰাথন দৌৰ প্ৰতিযোগিতা। দ্বিতীয় বার্ষিক মাৰাথান দৌৰ প্ৰতিযোগিতাত অৰ্ধশতাধিক প্ৰতিযোগীয়ে অংশগ্ৰহণ কৰে । প্ৰতিযোগিতাখন উদ্বোধন কৰে অসম গাঁওৰক্ষী বাহিনী সংগঠনৰ মাৰ্ঘেৰিটা মহকুমাৰ উপদেষ্টা বিকাশ বৰুৱাই । বঁটা বিতৰণী অনুষ্ঠানত ভালেকেইটা জাতীয় জনগোষ্ঠীয় দল-সংগঠনৰ বিষয়ববীয়া উপস্থিত থাকে । অসমীয়া যুৱমঞ্চৰ বৰডুমচা- পেঙেৰীৰ আঞ্চলিক সমিতিৰ ভাৰপ্ৰাপ্ত সভাপতি দিলীপ গগৈ আৰু সাধাৰণ সম্পাদক প্রাঞ্জল মৰাণে মাৰাথান দৌৰ প্রতিযোগিতাত অংশগ্ৰহণ কৰাৰ বাবে সকলো প্ৰতিযোগীলৈ আন্তৰিক ধন্যবাদ জনায় ।