১০ দিনীয়া চন্দ্ৰ অভিযান সামৰি পৃথিৱীত অৱতৰণ আৰ্টেমিছ ২-ৰ

ভাৰতীয় সময় অনুসৰি শনিবাৰে পুৱা ১০ দিনীয়া ঐতিহাসিক চন্দ্ৰ অভিযান সমাপ্ত কৰি আৰ্টেমিছ ২-ৰ মহাকাশচাৰীসকল পৃথিৱীলৈ ঘূৰি আহে। মহাকাশচাৰী কঢ়িয়াই অনা মহাকাশযানখন প্ৰশান্ত মহাসাগৰত সুৰক্ষিতভাৱে অৱতৰণ কৰে। পৃথিৱীৰ বায়ুমণ্ডলত প্ৰৱেশ কৰাৰ পিছত নাছাই আৰ্টেমিছ ২-ৰ দলটোৰ সৈতে যোগাযোগ স্থাপন কৰে। এই দলটোত আছিল কামাণ্ডাৰ ৰিড উইজেমেন, পাইলট ভিক্টৰ গ্লভাৰ, ক্ৰিষ্টিনা কচ আৰু কানাডাৰ জেৰেমী হেনচেন।পৃথিৱীলৈ ঘূৰি অহাৰ সময়ত মহাকাশযানখনে শব্দৰ বেগতকৈ ৩০ গুণ অধিক বেগত যাত্ৰা কৰিছিল আৰু সূৰ্যৰ উপৰিভাগৰ উষ্ণতাৰ প্ৰায় আধা উষ্ণতাৰ সন্মুখীন হৈছিল।১ এপ্ৰিলত ফ্লৰিডাৰ পৰা আৰম্ভ হোৱা এই ১০ দিনীয়া অভিযানটো বহুতো অভিলেখ আৰু উল্লেখযোগ্য মুহূৰ্তৰ সাক্ষী হৈ ৰ’ল।