বিজ্ঞান আৰু প্ৰযুক্তি মন্ত্ৰালয়ৰ তত্বাৱধানত আৰু পৃথিৱী বিজ্ঞান মন্ত্ৰালয়ৰ সহযোগত অহা ৩ ডিচেম্বৰলৈ চলিব এই বিজ্ঞান মহোৎসৱ। বৈজ্ঞানিক আৰু ঔদ্যোগিক গৱেষণা পৰিষদে আয়োজন কৰা এই অনুষ্ঠানক ভাৰতৰ বৈজ্ঞানিক আৰু প্ৰযুক্তিগত পৰিৱেশৰ এক গুৰুত্বপূৰ্ণ অনুষ্ঠান হিচাবে পৰিগণিত হ’ব । পাৰমাণৱিক শক্তি বিভাগ, মহাকাশ বিভাগ, আই আই টি গুৱাহাটী আৰু বিজ্ঞান ভাৰতীয়েও ইয়াত সহযোগিতা আগবঢ়াইছে । ভাৰতক গ্ল’বেল মেনুফেকচাৰিং হাবলৈ ৰূপান্তৰিত কৰা শীৰ্ষক বিষয়বস্তুৰে আয়োজন কৰা আই আই এছ এফ ২০২৪ উত্তৰ-পূবত আয়োজিত প্ৰথম সংস্কৰণ হ’ব আৰু এই অনুষ্ঠানে বিজ্ঞান-প্ৰযুক্তিৰ প্ৰসাৰৰ ক্ষেত্ৰত এক উল্লেখযোগ্য
মাইলৰ খুঁটি হিচাপে চিহ্নিত হ’ব বুলি আশা কৰা হৈছে । এই অনুষ্ঠানে অপ্ৰতিনিধিত্বশীল অঞ্চলসমূহলৈ বিজ্ঞান আৰু উদ্ভাৱনক সম্প্ৰসাৰিত কৰিবলৈ ভাৰত চৰকাৰে গ্ৰহণ কৰা পদক্ষেপৰ বিষয়ে বিশেষভাৱে আলোকপাত কৰিব । ইতিমধ্যে আই আই টি গুৱাহাটীত গঢ়ি তোলা হৈছে চাৰিখনকৈ চাইন্স ভিলেজ । প্ৰতিখন চাইন্স ভিলেজত দেশৰ ভিন্ন প্ৰান্তৰ ৬০০ কৈ মুঠ ২৪০০ ছাত্ৰ- ছাত্ৰীয়ে অংশগ্ৰহণ কৰিছে । তদুপৰি গুৱাহাটী মহানগৰীৰ আশে- পাশে থকা ভিন্ন শিক্ষানুষ্ঠানৰ প্ৰতিদিনে ৬০০ গৰাকীকৈ ছাত্ৰ ছাত্ৰীয়ে অংশগ্ৰহণ কৰিব প্ৰতিখন চাইন্স ভিলেজত। আজিৰ শুভাৰম্ভ অনুষ্ঠানত অসমৰ মুখ্যমন্ত্ৰী হিমন্ত বিশ্ব শৰ্মা, মন্ত্ৰী কেশৱ মহন্তকে প্ৰমুখ্যে কৰি বিজ্ঞান আৰু প্ৰযুক্তিবিদ্যা বিভাগৰ বিভিন্ন বিষয়ববীয়া উপস্থিত থাকে। দেশৰ আগশাৰীৰ বিজ্ঞানীসকলে অংশগ্ৰহণ কৰিবলগীয়া বিজ্ঞান মহোৎসৱত মুঠ ১২ হাজাৰ ছাত্ৰ ছাত্ৰীয়ে অংশগ্ৰহণ কৰিব বুলি উল্লেখ কৰে মুখ্যমন্ত্ৰীগৰাকীয়ে।
আই আই টি গুৱাহাটীত আজিৰে পৰা আৰম্ভ হৈছে ভাৰত আন্তঃৰাষ্ট্ৰীয় বিজ্ঞান মহোৎসৱ ২০২৪ ৰ দশম সংস্কৰণ।
