শুকুৰবাৰে পোখ্ৰাণ ফিল্ড ফায়াৰিং ৰেঞ্জত অনুশীলনৰ সময়ত কাৰিকৰী বিজুতিৰ বাবে তিনিটা পৃষ্ঠৰ পৰা বায়ুলৈ ক্ষেপণাস্ত্ৰ নিক্ষেপ কৰা হৈছিল বুলি সামৰিক সূত্ৰই প্ৰকাশ কৰিছে । এই ক্ষেপণাস্ত্ৰসমূহৰ ৰেঞ্জ ১০ৰ পৰা ২৫ কিলোমিটাৰৰ ভিতৰত । তিনিওটা ক্ষেপণাস্ত্ৰই ৰেঞ্জৰ বাহিৰলৈ গৈ বিভিন্ন গাঁৱৰ পথাৰত খুন্দা মাৰি তীব্ৰ বিস্ফোৰণৰ সৃষ্টি কৰে । অৱশ্যে এই ঘটনাত কোনো লোক হতাহত বা আহত হোৱাৰ খবৰ পোৱা নাই । নচনাৰৰ ডি এছ পি কৈলাশ বিষ্ণোইয়ে এই কথা নিশ্চিত কৰি আজাছাৰ গাঁৱৰ এখন পথাৰত ক্ষেপণাস্ত্ৰ উদ্ধাৰ হোৱা বুলি জানিবলৈ দিয়ে । আন এখন পথাৰত উদ্ধাৰ হয় দ্বিতীয়টো ক্ষেপণাস্ত্ৰ । ক্ষেপণাস্ত্ৰৰ বিস্ফোৰণৰ ফলত দুখন পথাৰত বৃহৎ গহ্বৰ সৃষ্টি হয় । সেনাৰ সূত্ৰ অনুসৰি ‘ভুলতে’ নিক্ষেপ কৰা দুটা ক্ষেপণাস্ত্ৰৰ ধ্বংসাৱশেষ উদ্ধাৰ কৰা হৈছে যদিও তৃতীয়টো উদ্ধাৰ হোৱা নাই । সম্প্ৰতি আৰক্ষী আৰু সেনাই তৃতীয়টো ক্ষেপণাস্ত্ৰৰ সন্ধানত অভিযান চলাই আছে । প্ৰতিৰক্ষাৰ মুখপাত্ৰ লেফটেনেণ্ট কৰ্ণেল অমিতাভ শৰ্মাই কয় যে ১০ৰ পৰা ২৫ কিলোমিটাৰ দূৰত্বৰ ক্ষেপণাস্ত্ৰসমূহ সেনা বিশেষজ্ঞই পৰীক্ষা কৰি আছে । কিন্তু সামৰিক অনুশীলনৰ সময়ত হোৱা কাৰিকৰী বিজুতিৰ বাবে ‘আকস্মিকভাৱে’ এই ক্ষেপণাস্ত্ৰ নিক্ষেপ কৰা হৈছিল । ইতিমধ্যে ঘটনাৰ তদন্ত আৰম্ভ হোৱা বুলিও তেওঁ কয় আৰু সেই আধাৰত অধিক ব্যৱস্থা গ্ৰহণ কৰা হ’ব বুলি কয় ।