মহাৰাষ্ট্ৰত প্ৰচণ্ড গৰমত ১১ জনৰ মৃত্যু । নবি মুম্বাইত আয়োজিত হৈছিল মহাৰাষ্ট্ৰৰ ভূষণ পুৰস্কাৰ অনুষ্ঠান । সেই অনুষ্ঠানতে মুকলি আকাশৰ তলত প্ৰচণ্ড ৰ’দত বহি থকাৰ ফলত হিট ষ্ট্ৰ’কত মৃত্যু হয় ১১জন লোকৰ । প্ৰখৰ ৰ’দ আৰু গৰমত অসুস্থ হৈ পৰে ১২০ জনৰো অধিক লোক । হাস্পতালত ভৰ্তি হৈ আছে অৰ্ধশতাধিক লোক । এম জি এম হাস্পতালত অসুস্থ লোকসকলক সাক্ষাৎ কৰি স্বাস্থ্যৰ বুজ লয় মুখ্যমন্ত্ৰী একনাথ শিন্দেই । হিট ষ্ট্ৰোকত আক্ৰান্ত হৈ মৃত্যু হোৱা লোকসকলৰ পৰিয়াললৈ ৫ লাখ টকাকৈ আৰ্থিক সাহায্য ঘোষণা কৰিছে মহাৰাষ্ট্ৰ চৰকাৰে । এই অনুষ্ঠানত সমাজকৰ্মী দত্তাত্ৰেয় নাৰায়ণ ওৰফে আপ্পাছাহেব ধৰ্মাধিকাৰীক মহাৰাষ্ট্ৰ ভূষণ পুৰস্কাৰ দিয়া হৈছিল, আৰু সেই উপলক্ষে তাত উপস্থিত হৈছিল তেওঁৰ লক্ষাধিক অনুৰাগী । অনুষ্ঠানত উপস্থিত আছিল কেন্দ্ৰীয় গৃহমন্ত্ৰী অমিত শ্বাহো । অমিত শ্বাহৰ হাতেৰেই মহাৰাষ্ট্ৰ চৰকাৰৰ এই বঁটা গ্ৰহণ কৰে ধৰ্মাধিকাৰীয়ে ।